नसीम अन्सारी
भुटाहा,। सुनसरीको हरिनगर गाउँपालिका भुटाहामा रहेका मस्जिदहरुमा कोरोना भाइरसबाट जोगिन सेनिटाइजर गरेको छ।
हरेक व्यक्तिको जीवनशैली नै कोरोना भाइरसका कारण परिवर्तन भएको छ। देश लकडाउनमा छ। सर्वसधारण घरबाहिर निस्केका छैनन्। बाहिर निस्केकाहरु पनि सामाजिक दूरी कायम गरिरहेका छन्। कोही दैनिक कैयौंपटक साबुन पानीले हात धुन्छन् त कोही सेनिटाइजर प्रयोग गर्छन्।
तर पनि कोरोना भाइरसको खतरामा रहेको महसुस सर्वसधारणले गरिरहेका छन्। सुनसरीको हरिनगर गाउँपालिकाका ७ वटै वडामा रहेको मस्जिदहरुमा कोरोना भाइरसबाट जोगिन कीटाणु मार्ने औषधि छर्किरहेका छन्।
कोरोनाबाटै जोगिन एलायन्स नेपाल संस्थाले मस्जिदमा औषधी छर्किन सुरु गरेको छ। संस्थाले हरिनगर गाउँपालिकाका ७ वटै वडाको हरेक मस्जिदमा सोडियम ‘हाईपोक्लोराइट’ नामक सर्फेस सेनिटाइजर छर्किने सुरु गरेको हो।
कोरोनाबाट जोगिन सरसफाइ राख्नुपर्ने भएकाले हरिनगरका सबै मस्जिदलाई सेनिटाइज गर्न लागेको संस्थाका अध्यक्ष तथा नेपाल मुस्लिम संघ प्रदेश नं. १ का सचिव नईम अन्सारीले बताए।
बिरगंज र उदयपुर मस्जिदमा बसेका केही जमातीय भारतीय नागरिकमा कोरोना संक्रमित भेटिएका थिए। अन्सारीले भने, ‘संक्रमित भेटिएपछि नेपाली नागरिक त्रसित छन्। त्यसैले त्रास घटाउन पनि औषधि छर्किन सुरु गरेका छौं।’
हरिनगर गाउँपालिका वडा नं. १ भुटाहाका ६ वटा मस्जिदमा शुक्रबार औषधि छर्किएको छ। बाँकी वडाहरुमा शनिबारदेखि निरन्तर औषधि छर्किने संस्थाका सदस्य जलाल अन्सारीले जानकारी दिए।
