नसीम अन्सारी
भुटाहा,। कोराना महामारीसंगै नेपाल भारत सीमानाका क्षेत्रबाट बढ्दो अपराध, तस्करी तथा लागु औषध ओसारपोसार लगायतका विषयमा भारती मुखिया र सुनसरीका सुरक्षा अधिकारीबीच छलफल भएको छ।
सुनसरीको हरिनगर गाउँपालिका ५ वसन्तपुर स्थित शिशुवामा प्रवेज आलमको घरमा शनिबार दिउँसो करिब साढे दुई घण्टा भारती मुखिया र सुनसरीका सुरक्षा अधिकारीबीच बैठक भएको हो।
प्रवेज आलमको पहलमा भारती मुखिया र सुनसरीका प्रहरी प्रमुख बैठकमा सहभागि भएको थियो । सुनसरी प्रहरीका प्रमुख कमल थापाले बैठकमा कारोनाको संक्रमण नियन्त्रण, सीमा अपराध, सीमा स्तम्भ, अवैध मुद्रा, मुख्य लागुऔषध र मदिराको अवैध ओसारपसार, साना हतियारको कारोबार, मानव बेचबिखन, रोक्ने विषयमा छलफल भएको जानकारी दिए।
प्रहरी उपरीक्षक थापाले भारती बजारबाट नेपाल भित्र्याउने मुख्य लागूऔषध, साना हातहतियार ओसारपसार र नेपाली बजारबाट मदिरा ओसारपसार पुर्नरुपमा नियन्त्रण गर्न दुवै देशका अधिकारी मिलेर र सहकार्य गरेर अघि बढेमात्रै नियन्त्रण सम्भव भएको निस्कर्ष बैठकबाट निस्किएको जानकारी दिए।
उनका अनुसार दुवै राष्ट्रका सुरक्षा अधिकारीले सीमाको रेखदेख र सीमा स्तम्भको संरक्षणमा एकजुट भएर लाग्ने प्रतिबद्धता जनाएका छन्।
यससंगै बैठकमा सीमा क्षेत्रको पछिल्लो सुरक्षा अवस्था र चुनौतीका बारेमा पनि छलफल भएको थियो।बैठकमा भारतबाट नेपालतर्फ हुने विभिन्न तस्करी, हतियार र लागुऔषधको ओसारपसार नियन्त्रणमा सहयोग गर्न भारतीय मुखियासँग आग्रह गरिएको थियो।
सो क्रममा भारतीय मुखियाहरुले बिहार राज्यमा चुनाव समेत रहेकोले नेपालका सुरक्षा अधिकारीहरुले नेपाली पक्षलाई भारततर्फ हुने न्यून गुणस्तरको र अवैध मदिरा ओसारपसार नियन्त्रणमा सहयोग गर्न आग्रह गरेका थिए।
विहारमा मदिरा प्रतिबन्ध भएपनि भारतीय नागरिक मदिराका सेवन गर्न नेपाल पुग्ने र अवैध रुपमा मदिरा भारततर्फ ओसारपसार हुने गरेको भारतीय पक्षको भनाई छ।
बैठकमा भारतका तर्फबाट बिहारको बसमतिया ग्राम पंचातका मुखिया मोजमिल अन्सारी , बेला ग्राम पंचातका मुखिया सफरुला आलम बबुवान ग्राम पंचातका मुखिया इमाज आलम घुरना ग्राम पंचातका मुखिया सज्जाद आलम लगायतको सहभागिता रहेको थियो।
नेपालका तर्फबाट प्रहरी प्रमुखहरु सुनसरीका एसपी कमल थापा र सशस्त्र प्रहरी बल सुनसरीका एसपी माधव प्रसाद पौडेल औषधी व्यवसायी धरान नगर सचिव प्रवेज आलम राष्ट्रिय मुस्लिम आयोगका सुनसरी जिल्ला संयोजक डाक्टर खालिद हुसेन सहभागी थिए।
