नसीम अन्सारी
भुटाहा,। सुनसरीको हरिनगर गाउँपालिका वडा नं.५ वसन्तपुरस्थित बंगाली टोलमा शुक्रबार साँझ भएको आगलागीमा एक करोड बराबरको क्षति भएको छ।
स्थानीय विवेक मण्डलको घरमा बालेको घुरबाट भएको आगलागीमा ५ परिवारको २२ वटा घर टहरा जलेको स्थानीयवासी दिपक मण्डलले जानकारी दिए। 
आगलागीमा एक करोड भन्दा बढीको क्षति भएको अनुमान गरिएको छ। आगो विवेक मण्डलको घुरबाट सल्केको बताइएको छ।
घुरबाट सुरु भएको आगो विवेक मण्डलको घरमा सल्केसँगै छिमेकी रमेश मण्डल ,पशुपति मण्डल ,पृतीचन्द मण्डल र मोहन मण्डलको घर पुर्ण रूपमा जलेर नष्ट भएका छन् । 
आगलागीका बेला हावा चलिरकाले आगलागी अनियन्त्रित बनेको प्रत्यक्षदर्शीहरुको भनाइ छ।आगलागीबाट दश लाख पचास हजार नगद ६ तोला सुन र १ सय ६८ टोला चाँदी लगायत ५ लाख बराबरको लत्ताकपडा,भाडा कुडा गरि जलेर सखाप भएका छन् ।
यसैगरी १ सय ५५ वटा परेवा २ सय ७०क्विन्टल धान, ८३ क्विन्टल गहुँ, ३३ क्विन्टल चामल ३ क्विन्टल दाल र ५ क्विन्टल मकै ५ वटा टिभी २ वटा बैलगाडा १ वटा मोटर ५ वटा ब्याट्री , ६ वटा साइकल १३ वटा बाख्रा सहित १ वटा थ्रेसर लगायत रु ८ लाखको फर्निचरको सामान जलेर नष्ट भएको शिशुवा प्रहरी चौकिले बताएका छन् । 
आगलागीमा खाद्यान्न, लत्ताकपडासहितका सबै सामाग्री जलेपछि आगलागी पीडितहरुको विचल्ली भएको छ।
आगो करिब दुई घण्टापछि इनरुवा, कोशी, बराहक्षेत्र , दुहबी र इटहरीका दमकल,सुरक्षाकर्मी र स्थानीयको सहयोगमा नियन्त्रणमा लिइएको थियो।
आगलागी पीडितहरुलाई हरिनगर गाउँपालिकाका अध्यक्ष गफार अन्सारी तथा सुनसरी क्षेत्र नं. ४ (ख) का सांसद हाजि ताहिर अन्सारी सहित टोलिले घटना स्थलमा पुगि पिडित परिवारहरुलाई राहत उपलब्ध गराएको छ। 
अध्यक्ष अन्सारीले प्रत्येक पिडित परिवारहरुलाई नगद ५ हजार एक-एक बोरा चामल , भुजा, दाल , मसला, खाना पकाउने भडा बरतन चिसोबाट वचन न्यानो लत्ताकपडा वितरण गरेको सेराज फहाहीले जानकारी दिनुभएको हो। 
हरिनगरा रेडक्रस लगायतका संघसंस्थाले पीडितका लागि राहत वितरणको तयारी गरेका छन्। 
