टोमराज मेहता १० पुष २०७६ मा प्रकाशित
इनरुवा । हरिनगर गाउँपालिका र भोक्राहा नरसिंह गाउँपालिका भित्र रहेको सामुदायिक विद्यालयहरुलाई नमुना बनाउनका लागि शैक्षिक आवलोकन भ्रमणमा उक्त गाउँपालिकाहरु सक्रिय भएका छन् ।
हरिनगर गाउँपालिकाको शिक्षा शाखाले तीन दिने शैक्षिक आवलोकन भ्रमण बुधवार सम्पन्न गरेको छ । हरिनगर गाउँपालिकाका २८ जना विद्यालयका प्रधानाध्यापक, शिक्षक तथा शिक्षा समितिका सदस्य लगायतको सहभागीतामा शैक्षिक भ्रमण सम्पन्न गरेको हो । हरिनगर गाउँपालिकाका सामुदायिक विद्यालय, निजि विद्यालय र धार्मिक विद्यालयका प्रधानाध्यापक तथा शिक्षकहरुलाई इलाम, झापा र मोरङ्गको बिभिन्न नमुना विद्यालयहरुको अवलोकन गरी शिक्षकहरु बुधवार फर्किएका छन् ।
इलाम, झापा र मोरङ्ग लगायतको नमुना विद्यालयहरुको अवलोकन गरी जिल्लामा नमुना विद्यालय बनाउने प्रयासमा जुटेको हरिनगर शिक्षा शाखाका प्रमुख अजित कुमार मल्लिकले बताएका छन् । उनका अनुसार नमुना विद्यालय बनाउन आधुनिक प्रविधिमैत्री बनाई विद्यार्थीहरुलाई स्मार्ट टिभिबाट शिक्षण सिकाई कार्यलाई प्रभावकारी बनाई शैक्षिक स्तरमा सुधार ल्याउनका लागि अवलोकन भ्रमणको आयोजना गरिएको थियो । सो भ्रमणहरुमा सम्वन्धित गाउँपालिकाको लाखौं रकम खर्च भएको छ ।
त्यसैगरी भोक्राहा गाउँपालिकाका शिक्षकहरुलाई एकहप्ताका लागि पोखरा, गोर्खा र बुटवल लगायतको ठाउँमा रहेको नमुना विद्यालयहरुको अवलोकन गर्ने क्रममा सो क्षेत्रको टोली भ्रमणमा गएको छ । नमुना विद्यालय बनाउनका लागि भोक्राह नरसिंह गाउँपालिकामा रहेका विद्यालयका शिक्षकहरुको सहभागिता सो भ्रमण टोलीमा रहेको छ ।
आवलोकन पछि भोक्राहा नरसिंह गाउँपलिकामा रहेका विद्यालयहरुलाई पठनपाठन देखी भौतिक संरचना सहित ब्यवस्थित तरिकाले विद्यालय सञ्चालन गरी जिल्लाकै नमुना विद्यालय बनाउने उद्धेश्यले आवलोकन भ्रमणमा शिक्षकहरुलाई सहभागि गराएको भोक्राहा नरसिंह गाउँपालिकाको शिक्षा शाखा प्रमुख मनोज मेहताले बताएका छन् । उनका अनुसार शैक्षिक क्षेत्रमा गुणस्तरीयता ल्याउन र पठनपाठनलाई थप प्रभावकारी बनाउनको लागि आवलोकन भ्रमण गरिएको हो ।
सुनसरीको सीमावर्ती क्षेत्रमा रहेको विद्यालयहरुको स्तरोउन्नितका लागि र विद्यालयका कार्यरत शिक्षकहरुलाई पनि तालिम प्राप्त गरी अवलोकनमा देखेका सिकेका कुरा आ आफनो विद्यालयमा लागु गरी नमुना विद्यालय बनाउनुपर्ने शिक्षा समितिका सदस्य बेचन यादवले बताएका छन् । भोक्राहा नरसिंह गाउँपालिकाबाट नमुना विद्यालय अध्ययन अवलोकन भ्रमणमा ३१ जनाको सहभागिता रहेको यादवले बताएका छन् ।
भ्रमणबाट शिक्षण सिकाई, शैक्षिक सामाग्री, विधि, पठनपाठन प्रभावकारी, मुल्याङ्कन र भौतिक संरचना लगायतका बिषयवस्तुमा केन्द्रित भई विद्यालयको ब्यवस्थापनमा ध्यानदिए नमुना विद्यालय बनाउने प्रयास सफल हुने भोक्राहा नरसिंह शिक्षा शाखा प्रमुख मेहताले बताए ।
