स्मार्ट२४ न्यूज
विराटनगर,। प्रदेश नम्बर १ का मुख्यमन्त्री शेरधन राईले मन्त्रिपरिषद् विस्तार गरेका छन् । उहाँले दुई मन्त्रालयमा मन्त्री पद खाली राखेर चार राज्यमन्त्री थप गरेका हुन् ।
मुख्यमन्त्री राईले ओखलढुंगाका अम्बिर गुरुङ, इलामका राम राना, झापाकी जसमाया गजमेर र मोरङका विजय विश्वासलाई राज्यमन्त्री नियुक्त गरेका छन् । चारैजनालाई आज अपराह्न सपथ ग्रहण गराउने तयारी भइरहेको स्रोतले बताएको छ ।
मुख्यमन्त्री शेरधन राईले जसमाया गजमेरलाई सामाजिक विकास मन्त्रालय, अम्बिर गुरुङलाई भौतिक पूर्वाधार, राम रानालाइ भूमि कृषि तथा सहकारी मन्त्रालय र विजय विश्वासलाई पर्यटन मन्त्रालयमा नियुक्त गरेका छन् ।
एक नम्बर प्रदेशमा सात वटा मन्त्रालय छन् । मुख्यमन्त्री शेरधन राईले भौतिक योजना तथा पुर्वाधार विकास र भूमि, कृषि तथा सहकारी मन्त्रालय आफैं हेर्दै आएका छन् ।
पूर्वाधार मन्त्रालयमा उनले गुरुङलाई राज्यमन्त्री नियुक्त गर्न लागेका हुन् । लामो समय अमेरिका बसेका गुरुङ ओखलढुंगा प्रदेश निर्वाचन क्षेत्र १ बाट प्रत्यक्ष निर्वाचित सांसद हुन् । उनी मुख्यमन्त्रीको विश्वासपत्र मानिन्छन् ।
शनिबार मात्र पार्टीको प्रदेश कमिटीले खाली रहेका मन्त्रालयमा मन्त्री नियुक्त गर्न निर्देशन दिएको थियो । तर मुख्यमन्त्री राईले भने मन्त्री खाली राखेर राज्यमन्त्री नियुक्त गरेका हुन् । राज्यमन्त्रीमा नियुक्त भएका चारै जनालाई आज सपथग्रहण गराउने छ ।
प्रदेश सरकारको मन्त्रिपपिरषदमा एक महिलासहित चार नयाँ राज्यमन्त्री नियुक्त भएका छन् ।
