स्मार्ट २४ न्यूज
इनरुवा,। सुनसरीको दक्षिणी क्षेत्र कप्तानगञ्ज स्थित नेपाल भारत सीमा नाकाबाट विहीबार दिउँसो अवैध रुपमा भन्सार चोरी तस्करीका ३ करोडभन्दा बढीको सामानहरु सुरक्षा निकायकै सामुन्नेमा ओसारपसार भएको छ ।
भारतीय बजारबाट भारतीय नम्बर प्लेटका ३० देखि ३५ वटा मोटरसाईकलमा एकै पटक अवैध मालसामानहरु चोरी तस्करी गरेर कप्तानगञ्ज सीमा क्षेत्रमा नेपाली नम्बर प्लेटका ट्याक्टरमा लोड गरी सुनसरी तथा मोरङका बजारसम्म लैजाने अवस्थामा पाईएको थियो ।
सीमा नाकामा भन्सार राजश्व छली गरेर विहीबार बिहानदेखि दिउँसो अवेरसम्म ३० वटाभन्दा बढी ट्याक्टरमा प्याजसहितका सामानहरु तस्करीमा प्रयोग गरिएका ३५ वटा मोटरसाईकलमा ओसारपसार गरि ति ट्याक्टरहरुमा लोड गरिएको थियो ।
सीमा नाकामा रहेको छोटी भन्सार कार्यालयले साना–साना परिमाणको १० हजार मुनीको सामानहरुको मात्र भन्सार राजश्व लिन पाउने राजश्व ऐनमा व्यवश्था भए पनि सुरक्षा निकायको मिलोमतोमा दिउँसै प्रत्येक ट्याक्टरमा दुईदेखि १० लाखसम्मको मालसामानहरु १० हजारको राजश्व तिरेको देखावटी कागज बनाएर तस्करी भएको हो ।
सुनसरी भन्सार कार्यालय सेतुबन्ध कोशी व्यारेजका भन्सार प्रमुख अधिकृत प्रमोद साहले साना परिमाणका कच्चा पदार्थबाहेकका मालसामानहरुको १० हजारसम्म मात्र भन्सार राजश्व छोटी भन्सार कार्यालयले लिन पाउने बताए ।
उनले मुल भन्सार कार्यालयबाट मात्र ठुलो परिणामका मालसामानहरुको भन्सार राजश्व लिन पाउने नियम रहेकाले ठुला सवारी साधनहरुमा लोड भएका सामानको हकमा सुनसरी भन्सार कार्यालय सेतुबन्ध कोशी व्यारेजमा आएर व्यापारीले राजश्व बुझाउनु पर्ने बताए ।
प्रमुख साहले आफुले समेत यस बिषयमा सूचना पाए लगतै त्यहाँ कार्यरत कर्मचारीसँग सोधपुछ गरी यर्थात बुझ्ने काम गरेकाले शुक्रवार त्यस क्षेत्रको जानकारी लिन जाने तयारीमा रहेको बताए । उनले आफूले अनुगमन गरेर यथार्थ सार्वजनिक गर्ने प्रतिबद्धता ब्यक्त गरे ।
सीमा नाकामा सशस्त्र प्रहरी वलका सशस्त्र प्रहरी निरीक्षकको नेतृत्वमा वोर्डर आउट पोष्ट र नेपाल प्रहरीको प्रहरी सहायक निरीक्षकको नेतृत्वमा सुरक्षाकर्मीहरुसहित छोटी भन्सार कार्यालयका दुईजना सहायक स्तरका कर्मचारीहरु कार्यरत रहेका छन ।
विहीबार बिहानको समयदेखि भारतीय बजारबाट खुल्ला रुपमा तस्करहरुले प्याजलगायतका मालसामानहरु ओसारपसार गरी भण्डारण गरेसँगै विभिन्न स्थानबाट एकै साथ २० वटाभन्दा बढी ट्याक्टर ल्याएर तस्करीका सामानहरु सुरक्षित रुपमा विभिन्न स्थानतर्फ लगिएको थियो ।
सशस्त्र प्रहरी वलका प्रहरी निरीक्षक विदामा रहेकाले सशस्त्र प्रहरी नायव निरिक्षक गंगा पाण्डे र नेपाल प्रहरीका प्रहरीका बलभद्र लिम्बुको निगरानीमा ३ करोडभन्दा वढीको ठुलो परिणाममा ति सामानहरु गन्तव्यतर्फ लैजान प्रत्यक्ष रुपमा सीमा नाकामा पहरा दिएका थिए ।
कप्तानगञ्ज तथा देवानगञ्ज क्षेत्रका स्थानीय व्यापारीहरुले सीमा नाकाबाट एकै पटक दिउँसोको समयमा गैह्कानूनी रुपमा सुरक्षा निकायको प्रत्यक्ष निगरानीमा ३ करोडभन्दा बढी मुल्यको मालसामानहरु तस्करी भएको दावी गरे ।
रातीको समयमा सीमा नाकाबाट हुने अवैध मालसामानको चोरी तस्करी कप्तानगञ्जमा दिउँसोको समयमा खुल्ला रुपले भएपछि स्थानीयवासी तथा व्यापारीहरुले सुरक्षा निकायले राजश्व चुहावटका लागि तस्करलाई संरक्षण गरी व्यक्तिगत फाईदाका लागि रकम असुली गरेकाले सीमा क्षेत्रमा यस घटनाले थप तस्करी बढने बताउँछन । वर्णमाला दैनिकबाट
