सुनसरी १३ भदौ,। कोशी प्रदेशसभाको बैठक भोलि शुक्रबार दिउँसो १ बजे बस्ने भएको छ । कोशी प्रदेशसभा नियमावली, २०७४ को नियम ६ को उपनियम ३ बमोजिम बैठक बस्न लागेको कोशी प्रदेशसभा सचिवालयका सचिव गोपालप्रसाद पराजुलीले जानकारी दिए ।

यसअघि भदौ १८ मा बैठक बस्ने तय गरिएको थियो । विशेष कारण भन्दै शुक्रबारका लागि बैठक बोलाइएको हो । गत असार ८ गते १३ औँ बैठक बसेयता बैठक बस्न सकेको थिएन । कोशीमा हालसम्म पनि मन्त्रिपरिषद्ले पूर्णता पाउन सकेको छैन ।